|
يازين باشلانيشي كي طبيعتين اويانماغينا باعث اولور بيزيم كولتوروموزده ((نوروز بايرامي)) آدلانيب.
نوروز بايرامي ايران، آذربايجان، افغانيستان، توركيه و اورتا آسيا دا آدليم راق و تانينميش بير رسم ساييلير و ان قديم چاغلاردان بو ميللتلر ياز فصلينين ايلك گونلرين ان طنطنه لي شكيلده عزيز توتوب و اسكي زمانلاردان قالان رسملر ايله بو بويوك بايرامي ديري ساخلاييبلار.
نوروز بايرامي نئچه ميللتين رسملرينين ييغينجاقيدير و هر ميللت اؤز رسملرين و عنعنه لريندن بو بايراما آرتيريب كي بو ايش نوروز بايرامين ايران، قافقاز، آنادولو و اورتا آسيا ميللتلرينين آراسيندا بير مشترك رسم اولماسينا باعث اولوب.
بو ميللتلر مسلمان اولاندان سونرادا بو بايرامي عزيز توتوب و بيرآزجا اسلامي بويا اونا ويرماق ايله بو بايرامي قاباقجاداندا گئنيش و بويوك شكيلده توتوبلار.
بو گونلر1382 نجي گونش ايلينين سون گونلرين آدديملاييب و يئني ايله يئتيشمه ك حالينداييق. دونيا سياستينده بو ايلده بويوك و اثرلي ايشلر و اولاييلار اولوندي و نئچه ميللتين يازيسي دگيشيلدي.
افغانيستان ميللتي طالبان حكومتيندن قورتولوب و يئني اساسي قانونلاري اونلاري بير مدني و دموكرات حكومتين صاحيب اولماقينا ساري آپارير. بيزيم بو تاييميزدادا عراق ميللتي بير مدني و آزاد حكومته يئتيشماقا ياخينلاشيب و گله جكلري اؤز اللرينده دير واگر ايسته سه لر بير آزاد ودموكرات حكومته صاحيب اولاجاقلار.
اما ايراندا هله دموكراسي يولو دومانلي دير و مدني حاقلار سياسي حيزبلرين دوكانيندا تاپيلمايان بير جينس ديلر.
ايراندا ياشايان ائتنيك لرين ميللي حركتلري كي ايرانين دموكراسييا يئتيشماقينين بيرينجي شرطي ساييلير هله گئنه ده ايراندا اؤز يئرين تاپماييب و شوونيسم گون به گون اولارا ويرديغي ضربه لرين آغيرلادير.
اينترنت ساحه سينده بو ايل آذربايجانين ميللي حركتينده ان بويوك و ياددا قالمالي ايل ايدير. بو ايل تورك ديلينده اولان سايتلارين سايي نئچه برابر اولدي و بو سايتلار اينترنتده آذربايجان ميللتينين بايراقچيسي اولدولار.
اومودوموز وار گلن ايلده بوتون آذربايجان ميللتي اؤز اللري و اراده لر ايله اؤزلرينه بير آيدين گله جك رسم ائديب و يئني ايلده يئني ياشاييش باشلايالار.
بو یازینین اوخونماق سایی: 689
|
