|
ايللر اونجه ((ظهراب)) جنابلاري- علي سليمي نين آتاسي- او زمان كي ايران آذربايجانيندان باكي شهرينه كوچوب اوردا ساكينلشمك مقصديله اوزونه حيات يولداشي سئچيردي بيلميردي اونلارين ازدواج لارينين ثمره لري استاد علي سليمي كيمي يوكسك شخصيت لي بير ذات اولوب، آذربايجان موسيقي سينين بير گون تمل لريندن ساييلاجاقدير.
علي سليمي گونش ايلي 1301 اينجي ايلده باكي شهرينده آنادان اولموش و هله 7-8 ياشيندا ايكن سونمز و دولغون استعدادين بروزه وئرركن موسيقي ساحه سينه چكيليب و باكي نين مختلف موسيقي مكتبلرينه گئدير لاكن تاسفله اوردا اولان موسيقي اوجاقلاري اونون يانغين روحونو سيراب ائده بيلمه دن 1312نجي ايلده سنينين آز اولماغينا باخماياراق رحمت ليك احمد باكيخانوفون حضورونا چاتيب و او ساحل سيز علم دنيزينين دالغالاريندان فايدالاناراق آذربايجان ملي اركسترينه عضو سئچيلركن آغير تجربه لر قازانير.
دئمه ك ائله بو ايللرده سووئت دولتي استاد علي سليمي نين عائله سين تابعيت شرطلرين قبول ائتمه مك لرينه گوره ايرانا قايتاريب و استاددا اوز قيريلماز علاقه سيله آذربايجان موسيقي ماهني لارين يئني بير اسلوبدا توپلاماغا باشلايير. استاد علي سليمي آردجيل تلاش لاري كولگه سينده ائده بيلميش آذربايجان اركسترينين رهبري سئچيلميش و همان زماندا راديو تهران دا فعاليت لر گوسترسين.
تهران دا مرحوم استاد روح الله خالقي، مرحوم استاد كلنل علينقي خان وزيري، استاد مشير همايون و باشقا ايران موسيقي استادلاريله گوروشوب تانيش اولموشدور.
استادين موسيقي هنرلرينين آردينجا گئتمه سي اونو مرحوم استاد حسين ناصحي محضرينه چكيب و او مرحومدان بين الخالق موسيقي، كنترپوان، مارموفي، كمپوزيسيون، ساحه لرينده اويرنمه گه باشلاركن آذربايجان فولكلوريك ماهني لارين توپلانماسينادا بئل باغلايير.
گونش ايلي1332نجي ايلده بير فستيوالدا "سئووت آذربايجاني" آدلي قطعه نين اجراسي او فستيوالين قيزيل مدالين اونا هديه گتيرير و اوندان سونرا مختلف ساحه لرده مثالدان اوتور سرود، ترانه، دوبيتي، فانتازي، مارش بسلمگه باشلايير.
اونون بسله ديگي آدليم "آيريليق" و "سيزه سلام گتيرميشم" آدلي ماهني لاري توركيه، بلغارستان، شوروي، يوگسلاوي و باشقا اولكه لرده سرعتله ياييلير.
سون ايللرده كينو(فيلم) صنعتيله علاقه دار اولاراق اونلارين موسيقي لرينين بسلمه لرينده اشتراك ائتميش و"سئو مني"، "كوچري"، "جاجيم" و "ساوالان" آدلي فيلم لرين متن موسيقي لرين چكير. بونلارين هاميسي آذربايجان موسيقي سينين تعالي و انكشافيندا بويوك روللار اويناييرلار.
1367نجي گونش ايلده "برائت از مشركين" آدلي فستيوالدا قيزيل مدال قازانميش و فجر دهه سينين دوردونجو فستيواليندا "استاد" ليق مقامينا يوكسكلركن قيزيل مدال آلميش و فخري دكترا قازانميش دير.
استاد علي سليمي بارلي عومرونده 1500 ياخين آهنگ ياراتدي كي آيريليق، سيزه سلام گتيرميشه م، تبريزيم و راحله آهنگلري اوستادين شاه اثرلريندن ساييلير. اونون آيريليق و سيزه سلام گتيرميشه م اثرلري سياسي سرحدلردن آشيب و آز زماندا بوتون تورك ائللرينين ديللر ازبري اولوب و گونئي آذربايجانين دردينين ترجماني اولدو. علي سليمي پهلوي زمانينين فرهنگي بوغونتوسوندا و او رژيمينين پان فارس سياستلرينين دورونده ايراندا آذربايجان موسيقي سينه يئني جان وئريب و تازا نسللرين قاباغينا بير گئن يول آچدي. آذربايجان كولتورونون بناسيندا علي سليمي بير بينوره ساييلير و اونون آدي آذربايجان تاريخينده قيزيل خط ايله يازيلمالي دير.
عومور بويي آذربايجان موسيقي سينين ديرچليشينده چاليشان صنعتكار، 75نجي ايلين اسفند آييندا مغزي سكته اثرينده خسته خانايا دوشوب و 76نجي ايلين ارديبهشت آيينين 3نده دونياسين دگيشدي و بوتون آذربايجانليلار و فرهنگ سئون انسانلاري ماتمه بورودي. اونون شانلي مزاري تبريزين وادي رحمتينده هنرمندلر بولومونده يئرلشيب. علي سليمي بو دونيادان كوچسه ده اوز ياراتديغي آهنگلر ايله بوتون آدربايجانلي و فرهنگ سئوه ن انسانلارين اوره يينده ياشاياجاقدير. بو یازینین اوخونماق سایی: 850
|
