بو دا پاييز يئنه خزان چاغي دير

چوللر بويو بيرغريبليک قوخويار

دوزده چايلار داغ حسرتلي آغيدير

چوللر اونو يانا- يانا اوخويار

يئنه پاييز پنجرمده کولکلر

اولن ياپراق ساپ- ساري بير غم دادير

آغاجلارين او سرگردان روحودو

کولک بئله غريبليکده اوينادير

ويصال- حسرت، سئوينج- کدر قاريشيق

اي خاطيرم، قوي کور اولوم توستونه

قوشلار کوچه ر غريب ائله بو گئجه

ياغيش ياغار بو گئجه نين اوستونه

ياغيش ياغار بو گئجه نين اوستونه

چيلپاق بوداق،اوستونده کي او اسن

اوچ يوز ايلي يولا وئريب قاريميش

قارا قارقا نه دانيشير گوره سن؟

اوز- اوزوندن اوزاق دوشموش بو يازيق

چيلپاق آغاج نه دوشونور، نه حاقدا؟

گور نئجه ده منه بنزر بو پاييز!

اولن يارپاق بلکه منم بوداغدا؟

اوره ييمده بير توکنمز کدر وار

دلي سئودام، مني ياخدي آيريليق

آللاه بو ايل پاييز- پاييز دئييل کي

آيريليقدي، آيريليقدي، آيريليق

روستم بهبودي