يئنيليگين گؤروشودور
سئوداميزين اوفوقونده بويلانان
شفقده گونشيميزين قانلي اؤپوشودور
قودورقان قارانليغا ايز سالان
اولدوزلارين    يوروشودور

گئجه نين دؤشونه سانجيلان
قهرمانليق    اوجاغيندا
اوجا داغلار قوجاغيندا

زيروه لره داشييرلار آرزيميزي
کؤنول کؤنول قورويورلار  يازيميزي
آيدينليق قوشلاري   قيزلار اوغلانلار
سؤنمز ايشيقلار
نغمه قاناديندا ياشاديرلار
دوستاق ائلي
ياساق ديلي
سازلي سؤزلو آشيقلار

اؤزگورلوگون ايستگيدير
ائل گوجويله    سئلله نير
قورتولوشون    ديلگيدير
باخيش باخيش گول له نير

چاغير گلسين قارانقوشلار
قايالارين  بئشيگينده
آذربايجان کئشيگينده

آغ  قارانين   دؤيوشو وار
اولدوزلارين يوروشو وار
ايگيتلرين گؤروشو وار 
ايپک بولودلار  بوينوندا
سيلدريم داغلار قوينوندا
قوجا قارتال يوواسيندا
اولو بابک    قالاسيندا

اسماعیل جمیلی