دئدي: يئر فيرلانير... اينانماديلار
اونلار اونا گولدي؛ اودا اونلارا
دئدي: حقيقته شوبهه نيز وارمي؟
دئديلر: حاق دئيه ن چکيلير دارا

او دئدي: فيرلانير؛ فيرلاناجاق يئر
بونا گولسه نيزده؛ گولمه سه نيزده
يئردن درس گوتوروب اولنه قدر
مگر فيرلانميريق حياتدا بيزده؟

فيرلانير سوزويله او بويوک اينسان
قيردي موهوماتين سرت بوزلاريني
عقلين بالتاسييلا ووردي باشيندان
سينديردي اوکوزون بوينوزلاريني

ميليون ايل دئديلر: قاشقا اوکوزله
چاتيبدير شرفه؛ شهرته دونيا
دئدي: يئر فيرلانير... يالنيز بو سوزله
تانيدي اوزونو ايلک دفعه دونيا

قاليله ((فيرلانير)) دئيه ندن بري
اوجالدي گويلردن يئرلره باخدي
هر جوره اويدورما؛ افسانه لري
عقلين آلوووندا يانديريدي؛ ياخدي

يئر فيرلانير دئيه؛ او چکدي فرياد
سوزونون گوجونو اوزوده بيلدي
ائله بيل؛ بير آنليق سوسوب کاينات
بو ايکي کلمه يه قولاق کسيلدي

دئدي: يئر فيرلانير- قاريشدي عالم
يئر دوردو؛ فيرلاندي مسجد- کليسا
دئدي: يئر فيرلانير؛ ائله بيل بو دم
تزه دن چکيلدي چارميخا عيسا...

دئدي: بو حوکمومه اينانيرام من
گره ک دگيشيله دونيانين آدي
دئدي: يئر فيرلانير!... بو ايکي سوزدن
پاپانين باشيندا؛ گوي گورولدادي

دئدي: يئر فيرلانير... بو ايکيجه سوز
مين بير سوال دوزدي ((اينجيل)) ين اوسته
پاپا غضبله نيب- داغ باساريق بيز
دئدي: بونو دئيه ن او ديلين اوسته

ديوانا چکديلر عاليمي درحال
دونياني دوشوندو؛ عشقيني آندي
بويوک جوردانوني يانديران تونقال
گوزونون اونونده گليب داياندي

مقدس کيتابا ال باسيب همان
دئدي: شککيم يوخدور؛ بو کيتاب حاقدير
آنجاق دوزو بودور: دئمه سمده من
يئر ائله فيرلانير فيرلاناجاقدير!

قلبه باخ؛ عشقه باخ! قورخوب اولومدن
او؛ اوز مسلکيندن گئري دونمه دي
حياتين نامينه سورونمه رم من
مسلکيم نامينه اوله رم دئدي

بشر تاريخينده بلالي انسان
ايکي قطب اونونده چوخ دايانيبدير
حاقدان ياپيشانلار گئچيب حياتدان
حياتدان قوپمايان؛ حاققي دانيبدير

قاليله ي! هله ليک کشفين بير يانا
اونون قيمتيني عاليملر بيلر
سن حاقدان دونمه دين حيات نامينه
بوندادير بويوکلوک؛ بوندادير هنر!

بو هنر اونونده باش اييرم من
اوتن زامانلارلا فيکريم اوپوشدو
اولوم آياغيندا ((انا الحق)) دئيه ن
منيم ((نسيمي)) مده ياديما دوشدو

بختيار وهابزاده