بورا خسته خانا، بئشینجی اوتاق
یالنیز ایکی خسته واردی بورادا
بیرینجی خسته ده ایکینجی سایاق
غرق اولوب قالیبدی گئنیش دونیادا

بیرینجی، قاپینین آغزیندا یاتمیش
گوردویو دوواردی، گوردویو دووار
پنجره یانیندا ایکینجی خسته
گورور پنجره دن آما هرنه وار

ازلدن انسانین قانلی سی انسان
قالمیش انسانلارین باختینا حسرت
ائله بورادادا البت قالیبدی
بیرینجی ایکینجی تاختیا حسرت

حیاتی گورمه دن یورولان انسان
یئرینده بیر باخیش محتاجی اولور
باخیشدا گول کیمی حیات باغیندا
واختیندا آچیلیر واختیندا سولور!

((ایچینده دئیه رک اوزو- اوزونه:
یاتایدیم او تختین اوسته کئشگه من!))
سورور ایکینجی دن بیرینجی خسته:
ایندی پنجره دن نه لر گورورسن؟

سسله نیر اوجادان ایکینجی خسته:
((گورورم آرابا، گورورم انسان
بوردان باخاندا شه هره، سانکی
ناری ایکی بولوب یئره قویموسان

بیر قیز، بیر اوغلانلا قول- بویون گلیر
زوغ آتمیش چیگنینده سئوینج قوللاری
گئجه نین بو واختی آغ آرابالار
سو کیمی ایچیرلر قارا یوللاری!

بو تایدان او تایا خیاوان ایچره
بیر قوجا سووشور آغیر، گورورم
حووضون آراسیندا، پارکین ایچینده
یاغیش یئرده ن گویه یاغیر گورورم!

چیراقلار آلیشیر گوزلرین کیمی
گئجه هر بیر شئی یه معنا وئریبدیر
بیر باخ! پنجره ده، بیزدن آشاغی
انسانلار دا اسیر، گئجه ده اسیر

داریخما نه قدر تاخت اوستونده سن
سنه گوز اولارام، قولاق اولارام
داریخما نه گورسم بو پنجره دن
سنه تعریف لرم من، سحر- آخشام))

***

بورا خسته خانا، بئشینجی اوتاق
کیم باسسا آیاغین بودار اوتاغا
گوره ر ایکی خسته ایکی مهربان
بیری گوزه دونوب بیری قولاغا

ایکینجی دئدیکجه گوردوکلرینی
حیات، رنگه دولور بیرینجی سینده
او، گوردوکلرینی دئدیکجه، بوندا
یارانیر سئوینجده، یارانیر کینده!

قفیلدن بیر گئجه ایکینجی خسته
قارالیر،آز قالیر نفس گلمه سین
بوغونتو بیر سسله او بیرینجی یه
دئییر: بارماغینلا باس زنگ دویمه سین!

بیرینجی خسته ده آما بیر خیال
ائدیر اوره یینی ایچینده دویون
او، بونو چاغیریر کومکه، بودا
هله فیکیر چکیر جنایت اوچون

ایکینجی خسته یه بو بیرینجی نین
بیردن نه اولدو کی اوره یی اسمیر؟!
زنگین دویمه سینی باسماغا نه دن
انسانلیق تله سمیر؟ بارماق تله سمیر؟

او گوردوکلرینی هر آن دئیه رک
بونا حیات وئریب، بونا جان وئریب
بو آما ((نرس)) ی خبر ائتمه یی
اونا آرتیق گوروب، اونا چوخ گوروب

بو زنگ دویمه سینی باسمیر کی بلکه
او اولسون بو اونون تاختیندا یاتسین!
ایشده بئله اولور، ایکینجی خسته
اولور کی بیرینجی مطلبه چاتسین

داها نه ایسته ییر آرتیق حیاتدان؟
گوتوروب بیر گئجه بونو سالیرلار
پنجره یانیندا تاختین اوستونه
بودا تله سیرکی گورسون هرنه وار

داها، ایندی اوزو هرنه یی گوره ر
داها گرکی یوخ آیریسی هر آن
باخیب پنجره دن شه هره- چوله
دئسین گوردوگوندن، دئسین حیاتدان!

داها گوره جکدیر خیاوانلاری
گوره جک هرنه یی اوز گوزو ایله
زحمتله، عذابلا قووزانیر بلکه
باخسین پنجره دن ائشیگه، ائله

باخیشی ائشیگه ساتاشماق همین
سانکی اوره یینه تاخیلیر بیر اوخ
پنجره اونونده یالنیز بیر بویوک
سیمیت دووار گورور، داها هئچ نه یوخ!!

***

 بورا خسته خانا، بئشینجی اوتاق...

محمدرضا لوايي