|
بو احوالات آخشام اوستي اولموشدي. آج- يالاواج بير جاناوار مئشه ايله گئده نده قاباغينا بير اوزون قولاق چيخدي. جاناوار دئدي:
- هه، اوزون قولاق، من سحردن يئمك آختاريرديم، اليمه ياخشي دوشموسن، ايندي سني يئيه جگم.
اوزون قولاق دئدي:
- آي جاناوار قارداش، دئيه سن سن آخماقسان. سن هله بو وقته قده ر بيلميرسن كي، اوزون قولاقين اتيني آنجاق سحرلر يئمك اولار! گئجه يئسن، سني زهرله ييب اولدورو. اتيمدن يئييب، اولمك ايسته ميرسن سه، اوندا بوردا بير آز گوزله، گئديم سنين اوچون يوموشاق يورغان- دوشك گتيريم سحره كيمي راحت يات، سحر دوروب يئيه رسن.
جاناوار دئدي:
- آي ساغ اول! سن لاپ آغيللي سوز دانيشيرسان. دور گئت يورغان- دوشك گتير. تئز اول. من بورادا اوتوروب، سني گوزليرم.
اوزون قولاق آتيلا- آتيلا ائوينه قاچدي. بيرده اورايا قاييتمادي. جاناوار گئجه نين ياريسينا قده ر اوزون قولاغي گوزله دي. جاناوار گوزلريني اوزون قولاق گئده ن يولا زيلله ييب چوخ گوزله ديكدن سونرا باشا دوشدوكي، اوزون قولاق اوني آلداديب. جاناوار برك غضب له ندي. آج- آجينا يولونا داوام ائتدي. اوز- اوزونه باغيردي و دئدي:
- قارشيما هرنه چيخسا، اوني ديري- ديري اوداجاغام!
جاناوار بوتون گئجه ني گزدي، دره لر گئچدي، تپه لر آشدي، سحره ياخين قاباغينا بير گئچي چيخدي. جاناوار قيشقيردي:
- هه، گئچي، ايندي من سني يئيه جگم.
گئچي يازيق- يازيق ديلله ندي:
- من سنين اختياريندايام، آنجاق منيم اتيم چوخ دادسيز دير. اوني ساريمساق سيز، تورشي سيز يئمك اولماز! چوخ شيتدير! ايجازه وئر ائوه گئديب ساريمساق و تورشي گتيريم اونونله يئه.
جاناوار راضي اولوب، دئدي:
- دوز دئيرسن، من اوزوم ده ائشيتميشم كي، گئچي اتيني تورشلا خورشلا، ساريمساقلا يئيه رلر... ياخشي كي، بوني ياديما سالدين! دي گئجيكمه، گئت، تئز تورشو، ساريمساق گتير گل!
جاناوار اوزون قولاغي گوزله ديگي كيمي، گئچيني ده چوخ گوزله دي، آمما گئچي قاييتمادي، جاناوار غضبيندن ديش لريني قيجيردي. او، آجليقدان چوخ آلدانديغي اوچون غضب له نميشدي. جاناوار هئچ اوزونه سيغيشديرا بيلميردي كي، گئچي اوني آلداديب.
جاناوار اوز- اوزونو دانلاييردي: بو نه ايش دير، اوزون قولاق دا مني آلداتدي، اوزون قولاق يئكه اولدوغو اوچون اوندان گئچمه ك اولار، سن بير گئچي يه باخ، بير بالاجا بويو ايله من بويدا جاناواري آلداتدي. عيبي يوخدور، بوندان سونرا گره ك آغيللي اولام، آلدانمييام.
جاناوار اوز- اوزونه دانيشا- دانيشا مئشه ني آوارا، آوارا گزيردي. آجليق اوني طاقتدن سالميشدي. او، گليب دنيزين ساحلينه چيخدي. گوردي كي دنيزين ياخينلاغيندا كي گولمه چه ده بير جاميش اوزانيب دينجه لير. جاناوار آجيقلي- آجيقلي دئدي:
- آي جاميش، اولومونو گوزونون قاباقينا گتير، اينديجه سني يئيه جگم.
جاناوار ديش لريني قيجيردادا- قيجيردادا جاميشين اوستونه توللانماغا حاضيرلاشدي. جاميش باشيني تنبل- تنبل ييرغالاييب، دئدي:
- هم. مم. مم. من ائله بيليرديم كي سن آغيللي حيوانسان، آنجاق ايندي باشا دوشدوم كي، هئچ سندن آخماق حيوان يوخ ايميش. بوش- بوشينا نييه آتيليب دوشورسن، هاي- كوي ساليرسان! اونسيز ده سنين ديش لريندن قورتارماق چتيندير. سن گورموسن كي، من بوتون پالچيقا باتميشام. ياخشيسي بودور كي دئيه سن:
آي جاميش، سني پالچيقلي يئمه گه ايگره نيرم، گئت دنيزده چيم، اوزونو تميزله گل.
جاناوار دئدي:
- هه، دوز دئيرسن، گئت دنيزده چيم، پالچيغيني تميزله، آمما دنيزده چوخ قالماها، من لاپ آجام!
جاميش جاناوارين آخماقليغيني گوروب دئدي:
- هئچ ناراحات اولما، سن بورادا گوزله، من دنيزه گيريب پالچيغيمي يويوب گليرم.
جاميش دنيزه طرف گوتورولدي، جاناوار ايسه، دنيزين ساحلينده اوتوروب گوزله ييردي. جاميش اوزه- اوزه اوزاقلاشدي. جاناوار جاميشا باخيب حيرصلي- حيرصلي قيشقيردي:
- بسدير، چيمدين، داها تميزسن، چيخ قيراغا، بيلميرسن كي سني بورادا گوزله ييرم؟
جاميش اوزه- اوزه جواب وئردي:
- هه، عزيزيم، گوزله، ايسته ديگين قده ر گوزله! سنين كيمي آخماق مني يئيه بيلمز.
جاناوار حيرصيندن لاپ آغليني ايتيردي. گوردوكي بو دفعه ده اووي اليندن بوراخدي.
- قاييت- قاييت! دئيه، جاناوار ساحيلده اوطرف بو طرفه قاچير،هر دفعه لپه ساحيله دگديكجه يوخاري توللانيردي.
- بونه دير، سن دوغرودان سودان چيخماياجاقسان؟
جاميش جاناواري اله سالاراق دئدي:
- يوخ اششي!، ظرافت ائديره م، سنين له بير آز اويناماق ايستيره م.
جاناوار گوردوكي جاميش اونون دئديگينه باخماياجاقدير، اوندان ال چكيب، گئتدي. جاناوار هم يورولموشدو هم ده آجيدي. آياقلاريني گوج له چكيردي... اوزونو بير تهه ر مئشه يه ساليب، اوتون اوستونه اوزاندي. او بير آز دينجه لدي، سونرا اوزونه گلدي، گوردوكي، تارلادا بير آت اوتلايير.
- هه، عزيزيم، سن داها منيم اليمدن قورتارا بيلمزسن!... دئيه، جاناوار اولان- قالان قووه سيني توپلاييب آتا طرف توللاندي.
ات يالوارماغا باشلادي:
آي جاناوار واللاه، سن اوزون ده ياخشي بيليرسن كي، سنين يانيندا من هئچ نه يم! اونسوز دا مني يئيه جكسن، قارنين دوياجاق، آمما سندن بير ايسته گيم وار: انصاف ايله رحمتليك آتامين بير وصيتيني يئرينه يئتير.
جاناوار چيمخيرا- چيمخيرا دئدي:
- نه چرنله ييب، باش- قولاغيمي آپاريرسان، من آجيمدان اولوره م. سن د ه وصيت درديني چكيرسن، آتانين وصيتي نه دير؟
آت بوينوني بوكوب، يازيق- يازيق ديلله ندي:
- آتام وصيت ائتميشدير كي، ياشيمي اوگره نمه ميش، اولمه ييم. دال آياغيمين ناليندا آنادان اولدوغوم ايل- گون يازيلميش.
جاناوار راضيلاشدي.
- بو بير چتين ايش دگيل، وصيته عمل لازيمدير.
- دئدي: ناليني گوستر گوروم.
آت دال آياغيني قالديردي. جاناوار اگيليب دقتله نالا باخماق ايسته ينده آت اونون آخماق باشينا بير تپيك ويردي.
جاناوار بيرده يئريندن ترپنه بيلمه دي و اولدي. یازان: --- گؤنده رن: Redaktor webmaster@gajil.20m.com بو یازینین اوخونماق سایی: 788
|
