|
بيري واريدي،بير يوخيدي.گئچميش زمانلار بير شاهزاده ياشاردي.بير گئجه شاهزاده يوخوسوندا گوزه ل- گويچک بير نار قيز گوردي.سحر وزيرين يانينا چاغيردي؛يوخوسونو دانيشدي امرائيلدي کي نارقيزي تاپيب گتيرسينلر.
وزير اليني دوشونه قويوب دئدي:يوخودا گوردوگوني نئجه تاپماق اولار؟نه امرين واردئ يئتيريم يئرينه !آنجاق بونو باشارمارام.
شاهزاده حيرسلنيب دئدي: بيلميرم!گئت سنه اوچ گون موهلت وئريرم. اوچ گونه کيمي نارقيزي تاپيب گتيرمزسن بوينونو ويرديرام.
وزيرين علاجي کسيليب راضي اولدو،يولا دوزلدي.اوشهر سنين ،بو شهر منيم. اوچ ايل گزيب آختاردي آمما بير کس دن سوراق آلابيلمدي.
وزير کور-پئشمان سرايه ساري دوندوکي يولدا بير قاريا راست گلدي،سون دفعه اونداندا نارقيزين سئرين سوروشدي.قاري دئيد: بالا ، سن بو فيکردن ال چک. سن دئين اونارقيز آغ دئوين تلسينده دير!
وزير دئدي: علاج يوخدور نه اولور –اولسون گرک گئديم اوقيزي گتيرم.اوندا قاري نارقيزين يئرين بئله باشا سالدي:- چوخ –چوخ اوزاقلاردا بير باغ وار اوباغدا بير نارآغاجي وار؛وور-توت،اوچ نار يئتيره ر..نارقيزي اونلارين بيرينده دير.
آغ دئو گئجه –گوندوز اونارلارا کئشيک چکيرآمما نه فايدا او باغين يولو يوخدور.هرکيم باغا اياق باسسا واي حالينا ! اورا گئدنلرين هئچ بير دونمييب.
وزير يولا دوزلدي.آز گئتدي؛اوز گئتدي؛دره-تپه دوز گئتدي؛گوج –بلا گليب باغا چاتدي.يئددي گون,يئددي گئجه باغين اطرافيندا دولاندي.ايچه ري گيرمه يه يول تاپمادي.بيرده نه گوردو؟گوردو کي بوردورها بير هئيبتلي آغ دئو گلير.ائله بيل داغ يئريندن ترپنير.دئو باغين ديوارينا ياخينلاشدي؛وزير تئز گيزلندير.دئو ايکي بارماق ايله ايشاره ائلين زمان ديوار يارلدي.دئو ايچري گيرن زمان وزيرده اوندان بيرليکده ايچري گيردي و بير کولون ديبينده گيزلندي.گوزلدي گئجه ياريسي دئو يوخويا گئدنده وزير خلوتده نارين اوچونو ده دردي.دره لردن سئل کيمي؛داغلاردان يئل کيمي گليب يوردونا چاتدي.بير آغاجين ديبينده بير بولاق باشيندا اوتوردو.
نارين بيرين پارچالادي.ايچيندن بير شئي چيخمادي ايکينجي ناريدا پارچالادي –گئنه بير شئي چيخمادي؛اوچونجو ناري بولدوقو زمان ايچيندن بير اون بئش ياشندا بويو بسته گوزه ل-گويچک بير سونا کيمي قيز چيخدي.
وزير باخيب گوردو کي قيزي بو حالده سارايا آپارا بيلمه يجک اودور کي قيزي آغاج باشيندا اوتوردوب سارايا ساري يولا دوشدو.
بوندان خبردار اولان ساراي قولوقچي سي قراواش؛آغاجين ديبينده کي بولاغا گلدي ،باخدي گوردو بير قيزين عکسي دوشوب بولاغين سويونا؛باشين يوخاري قوزايان زمان بير گوزه ل قيزي گوردو.پاخيلليقدان آغاجا چيخيب قيزي سالدي يئره و اوزو اوتوردو قيزين يئرينده .قيز يئره دوشدوگونده بير قيزيل گوله دونوشدو.
بوياندان شاهزاده وزيرله بيرليکده گلديلر نارقيزين آپارسينلار.شاهزاده دئدي: وزير بو کي قراواش دير!
وزير چاشيب قالدي بيلمه دي نه دئسين.
شاهزاده بير قيزيل گول دييب ،کور-پئشمان سارايا دوندو.ائرته سي گون قراواش شازدانين گتيرديکي قيزيل گولو تولازلادي ائشيگه ؛گول يئره دوشدوگونده دونوب بير چينار آغاجي اولدو.
گونلرين بير گونو سارايدا تخته لازيم اولدو چيناري کسيب تخته يوندولار.بوتخته لردن بيريني او قارينين ائوينه آپارديلار و قويدولار تاغچايا.
قاري اود آلماق اوچون قونشويا گئتدي.تخته يئره دوشوب دونوب گئنه نار قيزي اولدو.نارقيزي ائو-ائشيگي سهمانلاييب ياخشي بير پيلوو پيشيريب گئنه تخته يه دونوشدو.
قاري گليب گوردو کي ائو سوپورولوب ؛پيلوو دمده ؛چاشيب قالدي کي بو کيمين ايشي اولا بيلير؟ارته سي گون قاري تنديرده قيزلنيب باشلادي گودميه.بيرده باخيب گوردو تخته يئره دوشوب بير نارقيزي اولوب باشلادي ائو سهمانلاماقا.
قاري تنديردن چيخيب قيزي يخلدي و دئدي:- قيزيم سن هارا بورا هارا؟سني بورا کيم گتيريب؟
قيز دئدي:سن اوزون!دئيرسن گئديم!
قاري دئدي: يوخ بالا گه ل قال يانيمدا قيزيم اول منه کومک ائله .
قيز راضي اولوب ؛يالواردي کي بو سيرري هئچ کيمه دئمسين.قاري دا دئدي: آرخايين اول هئچ کيمه دئمه رم.
آي اوتدو؛ايل دولاندي گونلرين بير گونونده شهره خبر سالديلار کي شاهزاده سفره چيخير ؛ جارسالديلار شهرده هرنه اينجي-ميرواري دوزن قيز واردير گليب شاهزاديه سفر پالتاري تيکسين.
نار قيز بو خبر ي ائشيديب قاريا دئدي: ايجازه وئر گئديم شاهزاده نين پالتارين اينجي-ميرواري دوزوم.
قاري دا راضي اولدو.قيزلار يغيشيب باشلاديلار پالتار تيکمه گه .نارقيز دئدي :قيزلار گلين هامميز باشميزا گلنلري بير-بيريميزه تعريف ائدک.هامي تعريف ائله ييب سيرا نار قيزا چاتدي,نار قيز دئدي:
من بير نار قيزيديم
آلمادان قيرميزيديم
وزير مني دئو باغيندان
قويدو بير آغاج باشينا
دوزول ميرواري دوزول
دوزول مينجيق دوزول
شاهزاده ده دئمه بو سس لري ائشيکده ن ائشيديرميش.بو حالده قراوش ده مطلبي آنلاييب شاهزاده يه دئدي:- قيزلاراوتانارلار قولاق آسما!
آمما شاهزاده گئنه قولاق شوشلدي و قيزين قالان سوزلريني ائشيتدي؛
نار قيز اوخودو:
گلدي قرواش بولاغا
چيخدي قوندو آغاج باشينا
سالدي مني اوردان يئره
بيتديم اولدوم گول آغاجي
دوزول ميرواري دوزول
دوزول مينجيق دوزول
بيرجه دنه گول دردي
شاه ائوينه گتيردي
سونرا آتديلار ائشيگه
دوندوم اولدوم بويلوچينار
دوزول ميرواري دوزول
دوزول مينجيق دوزول
بوسوزلري ائشيدن شاهزاده دئدي:
وزيرين گتيرديگي نار قيزي حتما بودور.قولاق آسيم گوروم داها نه دئيجک!
نار قيز دئدي:
چينار بير سحر کسيلدي
منده دونوب تخته اولدوم
آچاردي بير قاري تخته
ايندي گلديم مينجيق دوزه م
دوزول ميرواري دوزول
دوزول مينجيق دوزول
شاهزاده بوتون قيزلاري يولا ساليب نارقيزي اوز يانينا چاغيردي.گوردو دوغروداندا يوخودا گوردوگو نارقيزي ائله بوقيزيميش.احوالاتين بيرده باشدان آشاغا سوروشدي.نارقيزدا باشينا گلن احوالاتي باشدا –باشدا دئدي.سونرا شاه قاريني سارايا چاغريب قيزي اوندان ايسته دي.و امر ائله دي قراواشي دا بير خام آتين بئلينه باغلاييب چوله بوراخسينلار.
طبيل چاليب ؛قازان قوردولار قيرخ گون قيرخ گئجه چاليب اويناييب توي توتدولار.
بوردا ناغيلين بيتن يئريدي؛سوزون آخيره چاتان يئريدي؛اوشاقلارين يوخويه گئدن يئريدي. یازان: علي.ب.تورك گؤنده رن: Redaktor webmaster@gajil.20m.com بو یازینین اوخونماق سایی: 653
|
