|
اوشاق نمايشي:
يارديم چيل دوستلار
يازاني : زهره وفائي
اويونچولار:
1ـ آنا دووشان
2ـ بالا دووشان
3ـ كيرپي
4ـ داغ گئچي سي ( مارالي)
5ـ قافلان
************************************************************
«گؤركم بير ياشيل يئر و ديگر طرفده بير داغا بنزر اوجاليقدير. سؤزو راوي باشلايير، راوي تاماشاچيلار گؤزونه گؤرونمور ....»
راوي: گونلرين بير گونونده ـ گول كوتانين ديبينده
بير گؤزل دووشان خانيم ـ سسله دي:
آنا دووشان : گل آي جانيم!
اوغول بالام دور گئدك ـ داغ دؤشونو سئير ائدك
ايلك يازين خوش چاغىدير ـ اؤنده قافلان داغىدير
گزمه يه دور تله سه ك ـ يوباناماق نه يله سه ك
راوي : بالا دووشان سئوينجك ـ آتيلدي دوشدو قوش تك
بالا: گئدك آي آنا!
راوي: دئدي ـ يئر كوكوسون تئز يئدي
آنا بالا ال ، اله ـ اوز قويدولار گؤي چؤله
چيخديلار داغا ، داشا ـ داغي آلديلار باشا
چاتديلار ذيروه يه لاپ ـ دووشان باشلادي تاپ تاپ
آتيلماغا ، دوشماغا ـ اويناماغا، جوشماغا!
آنا هايلادي
آنا : آمان ! ـ آزجا اولسا دينج دايان !
ييخيلارسان آي اوشاق ـ قوي سلامت يئتيشك
قيچين بورخولار اوغول ـ اوغول دئمه بير نوغول!
راوي: آمما بالاجا دووشان ـ آناسىيله ووروشان
اصلاَ قولاق وئرميردي ـ سانكي آناني گؤرموردو
بالا دووشان بو حالدا ـ آناسي قاليب دالدا
قيريلدي بيردن بيره ـ آسقىسي دوشدو يئره!
دويمه سي قويدو قاچدي ـ داغي، دره ني آشدي
آغلاماغا باشلادي ـ دويمه م دئييب توشلادي
آناسي دئدي:
آنا: آي بالام ! آغلاما دويمه آللام!
آسقىني باغلارام من ـ آغلاسان آغلارام من!
راوي: آناسي بئيله ياشيندا ـ بيلميردي داغ باشيندا
دويمه هاردا ـ ساپ هاردا ؟!- ايينه هاردا؟ ساپ هاردا؟
............
راوي: بالا دووشان آغليردي ـ يامان آجي باغريردي
آناسي فيكره جوموب ـ نئيله سين دئيه توموب
.......
او حالدا بيرجه كيرپي ـ گليب مئيدانا گيردي
گوردو بير دووشان آنا ـ باغريندا بير كؤك بالا
ائهمال ائهمال دينديرير ـ اونو داغدان انديرير
دئدي:
كيرپي: آ دووشان خانيم ! ـ ندير كدر آي جانيم؟
بو بالا ندن آغلايير؟ ـ سنين اوره يين داغلايير!
راوي : آنا دئدي
آنا: قالميشام! ـ بونون آغرين آلميشام !
دويمه سي دوشدو گئتدي ـ داغ دره لرده ايتدي
ايندي نه ايينه نه ساپ ـ داغ باشيندا دويمه تاپ
راوي: كيرپي بير آز دولاندي ـ دويمه دئييب توولاندي
بيردن باغيردي:
كيرپي: آهان ! ـ علاجين تاپديم اينان !
داريخما دووشان ننه ـ گل سنه وئريم ايينه
چك تيكانيمدان بيرين ـ داماغيز اولسون شيرين
قالدي دويمه ، قالدي ساپ ـ بير آز دولان آختار تاپ!
راوي: ايينه ني آلدي آنا ـ ساغ اول دئدي تئز اونا
قالدي ايينه ساپ ايشي ـ دويمه ايشي آي كيشي!
.....
او حالدا بير سس گلدي- داغدان بير گئچي اندي
باخدي كي دووشان ننه ـ الينده بيرجه ايينه
دايانيبدير بير داشا ـ فيكره جوموب بير باشا
دئدي:
گئچي: نه دير آ دووشان! ـ منم سندن سوروشان
بو غم ، غوصصه ندندير؟ ـ باغرين زًدًن ـ زًدًن دير؟
دووشان دئدي:
آنا: بو ايينه ! ـ ساپييم يوخدور سن دئينه !
هاردان تاپيم من اونوـ ندير بو ايشين سونو؟
راوي: گئچي دئدي:
گئچي: اولاندير! ـ منيم توكوم كوتاندير !
ساپ يئرينه اونو قوي ـ آل تئليمدن بيرين سوي!
راوي:
آنا دووشان سئوينجك ـ توكدن بيرين چك ها چك
نهايت دارتيب آلدي ـ گئچىني يولا سالدي
الينده بير ايينه ساپ ـ گل ايندي بير دويمه تاپ!
آنا هئله چاره سيز ـ بالا باغيرير تئز !تئز!
دويمه سيز آسقي اولماز ـ داغدا دا دويمه اولماز
هله بالا باغيرير ـ دويمه سيني چاغيرير.
بيردن داغلار تيتره دي ـ آنا دئدي بو ندير؟
داغي داشي سس آلدي ـ هامى حئيرتده قالدي
ندير گؤره سن بو سس؟ ـ جه نه وردير يوخسا كس؟
....
قورخا قورخا دووشانلار ـ داش ديبينده قالانلار
گؤردولر آني حالدا ـ تاپ تاپ گليري دالدا
بير آغير آياق سسي ـ يامان اودلو نفسي
گؤروندو قافلان گؤزه ـ هئيكلي چيخدي دوزه
آنا بالا تيتره ييردي ـ ديشي ديشينه دييردي
آستاجا آنا دئيه ر:
آنا: بو يقين بيزي يئيه ر!
اوغول بالا تئز گيزلن! ـ چيخماسين سسين گيزلن!
يوخسا گؤررسه بيزي ـ آلارسا دووشان ايزي
بودار هم سني ، مني ـ زوردا يوخدور هئچ كمي
گؤرونمه هئچ گؤزونه ـ باخما اونون اوزونه
ييرتيجي ديشلري وار ـ دهشتلي ايشلري وار
....
راوي: قافلان ايره لي گلدي ـ دووشاني بير اييله دي
توولادي بوي ، باشيني ـ اويناتدي گؤز قاشيني
دئدي:
قافلان: چيخين بو داشدان ـ قورخمايين من يولداشدان
ايندىجه بير قوچ يئديم ـ تانرىيا شوكور دئديم
آج اولماسام يئمه رم ـ بيليين! يالان دئمه رم!
سن ده سؤيله هم الان ـ ندن آغلايير بالان؟
راوي: آنا دووشان آستاجا ـ آچدي گؤزدن بير باجا
قورخا قورخا سؤيله دي ـ قافلان حقّا دينله دي
دئدي:
آنا: آي قافلان قارداش ـ دووشانلار ايله يولداش
منيم بو بالا اوغلوم ـ اوغول دئمه ، دئ نوغولوم
دويمه سيني ايتيردي ـ مني تنگه گئتيردي
ايندي بير ايينه م واردير ـ بير ساپ اونا سواردير
آمما دويمه سي يوخدور ـ تيكمه يه موشگول چوخدور
راوي: قافلان گولدو اوجادان ـ قوشلار اوچدو باجادان
دئدي:
قافلان: دويمه نه بوىدا؟ ـ بالا، بؤيوك يول يول دا
اولسا ايه ر ايينه يه ـ گؤتور خاليم دويمه يه
دووشان بالا سئوينسين ـ اوره يي شاد دؤيونسون
راوي:
دووشان باخدي پلنگه ـ چيخماق اولماز كي جنگه
دئدي:
آنا: اولار! وئر قارداش ! ـ دويمه ني وئر تئزجه قاش
بالام قورخورو سندن ـ بئله گوبود بدندن !
راوي: دويمه ني آلدي آنا ـ ايينه ني تاخدي اونا
قافلانا دئدي:
آنا: ساغ اول! ـ گؤررسم سني بو يول
يئر كؤكو وئررم سنه ـ يارديم ائيله دين منه!
راوي: قافلان دئدي:
قافلان: گؤر ايشين ! ـ اوزاتما بئله ديشين
من يئر كؤكو يئمه رم ـ اونا يئمك دئمه رم
من يئيه رم اوو ، قوزو ـ اولسا ياغي يا دوزو
راوي: دئييب باش آلدي داغا ـ باخاركن سولا ساغا
دووشان ننه ايله شدي ـ تيكمه يه چوخ اللشدي
گئچي وئرن تئل ساپي ـ گئچيرتدي قاپي قاپي
پلنگين قارا خالين- تيكدي او قئييم قالين
آسقي يئريني آلدي ـ بالانين كئفي سازالدي
يول آلديلار گلمه يه ـ داغدان بري انمه يه
هر ايكىسي كئفي چاغ ـ سؤيله ييرلر ماهني ، لاغ
دانيشيرلار گولورلر ـ يامان كئفي سورورلر
آنا دووشان آستاجا ـ ايسته دي بير سؤز آچا
دئدي اوغلونا سؤزلرـ ائشيتمه يينه ديه ر
آنا: آي منيم اوغول بالام! ـ هر گون قاداني آلام
حيات بئيله دير ، بئله ـ چاليش توخونما ائله
توتسان بيرينين الين ـ توتارلار الين يقين
يارديم ائتسن بيرينه ـ اوشاق ، جاوان ، پيرينه
ياددان چيخماز هئچ زامان ـ حقيقتدير بونو آن!
وئرمه سه ائل اَل اله ـ اينانما خوشلوق گله
اليندن گلير هر نه ـ عارسيز يئتير يئرينه
دوستون مين اولسا آزدير ـ چوخ اولسا كئفين سازدير
×××××××××××××××××××××××××××××××××
قايناق : زهره وفائي وئبلاگي
http://zohre-vefayi.blogspot.com
یازان: زهره وفائي گؤنده رن: Redaktor webmaster@gajil.20m.com بو یازینین اوخونماق سایی: 623
|
