|
ساقي گوتور بو جامي آخير آراده قالدي
جاناندا دويدو منده، ايچديك زياده قالدي
باد فنايه وئردي، جمشيد تخت و تاجين
اوندان نشانه بيرجه بو جام باده قالدي
ايچدي او جام جمدن ضحاك پرقساوت
مست اولدي هم فريدون، مي كيقباده قالدي
سلطان حميد او مئيدن ميل ائتدي بير پياله
ايچدي اودا ييخيلدي، سلطان رشاده قالدي
زال اوغلو ميندي رخشه، آلدي اله او جامي
بير اوخ گليب قضادن، رستم پياده قالدي
هركس او مئيدتن ايچدي، حتي ده دمده اما
لعنت يزيده، نفرين، ابن زياده قالدي
چوخ قان توكولدو ناحق دونيا اوزونده، لكن
او سرنوشت خونين كرب وبلاده قالدي
بايرام چكيب عمودين، ائيلر گدايه حمله
ياران گلين هرايه، نعشيم آراده قالدي
عورت دئدي دؤن آل گل، گلديم ولي الي بؤش
بير دوتمه ووردي دوشدوم، قيشلار هاواده قالدي
او نامبارك آغزين، آچدي نعوذبالله
كئچميشلريم تمامأ بيت الخلاده قالدي
ائيله يامان يوغوزلار صرف ائيله دي حقيره
ياران! تعجبيمدن، آغزيم گشاده قالدي
قت- چاي گران اولاندان، ((معجز)) اولوبدي نشتو
سويله ر سماور ايندي، بي استفاده قالدي یازان: شبسترلي معجز گؤنده رن: Redaktor webmaster@gajil.20m.com بو یازینین اوخونماق سایی: 729
|
