Gecil.:.گجیل

                                                   پروفوسور هئيت جنابلارينا اتحاف
درين دورو باخيشيندا
دولو دولو بير عوموروار
ياز نفسلي اومودلارلا
گونش دوغان افقلره
آرزو يوکلو يئلکنلري  يوللانديران.

خان آرازين حسرتيدير
سورگون قارانقوشلاريلا
قان بويالي شفقلره قاطارلانان

سؤيلنمه ميش بويلار بويوندا اؤرتولن
آغير ايللر خزانيندا
ترک ائلينين سازلي سؤزلو گوهرينين
ايکي اوزلو ياد الينده
اوجوزلانماق آغريسيدير
ناخيش ناخيش اياقلانان
ايلمک ايلمک اوتانمازجا بودارلانان
ايپک معنا خاليسينين نيسگيليدير

درين دورو باخيشيندا بوي گؤسترن
سولماز سئوگي باهاريندا
باخيش باخيش بوداغلانان
اؤز اولمانين  اؤزگورلوگون چاغريسيدير

گوروشونون  ايشيغيندا
دوز دؤزوملر دوزلرينين
ميليون ميليون وورغونودور
هاراينا هاراي وئرن
اؤزونده اؤزلوگون گؤرن

ياساقلانميش آرزولاريدير
اومودلارين گؤي قورشاغي بوياسيندا ياشيللانان
آنا وطن اوره گيدير يئنيليکلره دويونن
وارليغيندا وارليغينا اويونن

بو آرينميش دورو ديلک  اؤلکه سينده
نسيمي لر دونياسيدير گؤزه ل لنير
سؤز صرافي فضولودور غزل لنير
اولو ده ده قورقودومدور
الده قوتسال قوپوزيله
چنلي بئللي آشيقلارا اؤيود وئرير
شهرياردير احتشاملي سراييله
سهند ديرپوزولمايان وقاريله
گوموش ساچلي ساحرلرين ساياسيدير
فرزانه لر اوردوسونون قالاسيدير
نطقي لرين  کماليدير
ايگيت بيلگين بالاسيدير
دان يئرينه ايره له يير

وارليغينين ايشيغيندا
وراق وراق وارليق اولان خزينه دير زنگينله شير
اونودولان دوننلردير بوگونلره  قوووشورو
آيدين اؤزگور يارينلاردير چيچکله نير
سوسدورولان سازلاريدير اوره کله نير
ساوالانين ياناغيدير لاله لنير

باخيشينين ايشيغيندا بير اولوسدور
بئشيک بئشيک باهارلانان
دوغرولارلا ياراقلانان
يالانلارا باش ايمه ين
دؤزن دايانان
دوزوميله  قازانان

درين اوزاق گوروشوندور
ائل سؤزونو سؤز ائيله ين
تاراج اولان  تالان اولان
بودارلانان بير بيرلري بيز ائيله ين
بو تورپاغين
بو ائللرين
وارليغينا سارماشيقدير وارليغينيز
ائلين سئوگي سارايندا ياراشيقدير او آدينيز

اول کيمسه کي ائل درديني چکدي قالان اولدو
کؤنلونده ائلين سونسوزا تک يئر سالان  اولدو
علمين  هنرين   هيئتي وار    اولدوغو گوندن
اؤزکيمليگيميز  وارليغيميز  وار  اولان اولدو
                                                           اسماعيل جميلي
                                                           سون باهار 2004 ساکرامنتو

بو یازینین اوخونماق سایی: 575

گجيل سايتي لينکي وئريلن سايت يا يازيلارين محتواسيندان سوروملو دئييل.